Um þessar mundir er ýmislegt um að vera í breskum mjólkuriðnaði. Nú er t.d. Arla UK loksins komið með leyfi fyrir byggingu á stærstu mjólkurpökkunarstöð í heimi, sem mun vinna úr 1.000 milljón lítrum árlega og hefur áður verið greint frá hér á naut.is. Annað stórt afurðafélag, Milk Link, hefur nú sett stefnuna á að gera afurðastöð sína í Lockerbie í Skotlandi að stærstu afurðastöð landsins með því að breyta henni fyrir 20 milljónir punda eða fyrir nærri 3,7 milljarða íslenskra króna. Eftir breytinguna verður mesta áherslan lögð á ostaframleiðslu og mun framleiðslugetan fara í 37 þúsund tonn af osti á ári. Í kjölfarið er talið að mjólkurframleiðsla í suð-vestur Skotlandi muni aukast verulega, sem og í norðurhluta Englands.
 
Á sama tíma hafa svo þeir 1.400 kúabændur sem leggja inn mjólk hjá Arla UK ákveðið að fjárfesta í félaginu, en Arla UK er hlutafélag að stærstum hluta í eigu um 10 þúsund kúabænda sem eiga móðurfélagið Arla (sænskir, danskir og þýskir kúabændur). Í dag er eignarhlutur hinna bresku kúabænda 3,2% en með því að leggja inn 4 pens af hverjum innvegnum líter í 8-10 ár frá og með 1. janúar nk. Alls hafa bændurnir skuldbundið sig til þess að fjárfesta fyrir 70 milljón pund í Arla UK eða fyrir nærri 12,9 milljarða íslenskra króna á næsta áratug eða svo/SS.