Beint í efni

Mikil nautakjötssala í ágúst!

19.09.2011

Bændasamtökin hafa nú tekið saman nýjar framleiðslu- og sölutölur fyrir ágúst. Í samantektinni kemur fram að sala á nautakjöti var 20,6% meiri en hún var á sama tíma í fyrra og að ársfjórðungssalan hafi verið 0,3% minni. Þessi mikla söluaukning í ágúst hefur jafnframt leitt til þess að árssalan, þ.e. salan sl. 12 mánuði, er nú 0,5% meiri en 12 mánuðina þar á undan.
 
Heildarframleiðsla nautgripakjöts sl. 12 mánuði var 3.799 tonn af 26.870 tonna framleiðslu kjöts í það heila og er hlutdeild nautakjötsins því 14,1% í framleiðslunni. Alls nam sala nautgripakjöts í mánuðinum 345 tonnum og sl. 12 mánuði var salan 3.827 tonn. Sé horft til sundurliðunar á sölu nautgripakjöts í mánuðinum var sem fyrr mest sala í ungnautakjöti eða 194 tonn og á 12 mánaða grunni nemur ungnautakjötssalan 2.176 tonnum eða 56,8% af heildarsölunni. Sala á kýrkjöti á ársgrunni nam 1.360 tonnum eða sem nemur 35,8% af heildarsölunni.
 
Sé litið til annarra kjöttegunda kemur í ljós að heildarsalan hefur dregist saman sl. 12 mánuði um 3,9% og sýnir einungis nautgripakjöt söluaukningu frá fyrra ári. Mest er salan á alífuglakjöti á landsvísu eða 6.926 tonn (29,8%) og þar á eftir kemur svínakjöt með 6.008 tonn eða 25,8% markaðshlutdeild. Er þetta í fyrsta skipti í tvö ár sem svínakjötssala fer upp fyrir kindakjötið. Þess ber að geta að litlu munar á þessum kjöttegundum enda situr kindakjöt í þriðja sæti með sölu upp á 5.944 tonn (25,6% markaðshlutdeild)/SS.