Bráðabirgðatölur um framleiðslu og sölu búvara fyrir árið 2007 liggja nú fyrir. Framleiðsla mjólkur varð 124.849.835 lítrar sem er það mesta sem skráð hefur verið á einu ári hingað til. Sala miðað við próteininnihald nam 114.881.128 lítrum (1,48% aukning frá árinu 2007) og á fitugrunni 108.696.042 (4,65% aukning frá fyrra ári). Þegar litið er á breytingar í einstökum vöruflokkum milli ára þá dróst sala á drykkjarmjólk saman um 0,55% (í lítrum) og skyri um 11,69% (í kg). Sala á viðbiti jókst hins vegar um 6,73 (í kg) og ostum um 5,66% (í kg).

7% aukning í kjötframleiðslu
Framleiðsla á kjöti jókst alls um 7% á árinu og nam alls 26.864 tonnum. Mest jókst framleiðsla á alifuglakjöti, um 14,2% og rösklega 11% á hrossa- og nautgripakjöti. Framleiðsla svínakjöts jókst um 6% en kindakjötsframleiðslan var óbreytt frá fyrra ári.

Heildarkjötsala jókst um rúm 6%
Heildarsala á kjöti árið 2007 jókst um 6,3% frá fyrra ári og nam 24.693 tonnum. Mest seldist af alifuglakjöti 7.457 tonn og er það í fyrsta skipti sem meiri sala er á annarri kjöttegund en kindakjöti, á ársgrundvelli. Mynd 1 í fylgiskjali sýnir breytingar milli ára eftir kjöttegundum.

Sala á íbúa eykst
Sala á kjöts á íbúa nam 79,5 kg en var 76,3 kg/íbúa árið 2006. Aukningin nemur því rétt rúmum 4%. Mynd 2 sýnir breytingar milli ára á sölu á íbúa eftir kjöttegundum.

Mest selt af alifuglakjöti
Kindakjöt og alifuglakjöt hafa haft sætaskipti á toppnum þegar reiknuð er út hlutfallsleg skipting kjötmarkaðarins milli ára. Svínakjötið heldur nær óbreyttri stöðu en aukin framleiðsla og sala á nautakjöti skila meiri sölu á íbúa og aukningu á hlutdeild í heildarkjötmarkaðnum. Sjá mynd 3 í fylgiskjali.

Innflutningur á kjöti nam 865 tonnum árið 2007
Heildarinnflutningur á kjöti frá janúar til nóvember 2007 nam 865 tonnum. Í töflu 1. má sjá hvernig innflutningurinn skiptist eftir kjöttegundum.

Fylgiskjal - myndir - framleiðsla og sala 2007 - pdf