Árið 2012 sótti breska fyrirtækið Dairy Crest um heimild til þess að fá að markaðssetja mjólk sem hafði verið meðhöndluð með útfjólubláu ljósi af sk. C gerð, en það er útfjólublátt ljós með mjög stutta bylgjulengd. Slíkt ljós hefur sýnt sig að vera mjög virkt til þess að drepa margskonar gerla og því títt notað í matvælaiðnaði. Dairy Crest hefur sýnt fram á að lengja megi líftíma hefðbundinnar gerilsneyddrar mjólkur úr u.þ.b. 12 dögum í 21 dag með því að nota útfjólublátt ljós við pökkun hinnar gerilsneyddu mjólkurinnar.

 

Í byrjun ársins skilaði matvælaöryggisstofnunin EFSA (European Food Safety Authority) áliti sínu og hefur fyrir sitt leiti heimilað sölu á mjólk sem hefur verið meðhöndluð með útfjólubláu ljósi. Slíka mjólk má þó ekki selja börnum yngri en eins árs segir í áliti EFSA sem má lesa í heild sinni með því að smella hér. Rannsóknir Dairy Crest hafa sýnt að meðhöndlun mjólkur með útfjólubláu ljósi hefur engin skaðleg áhrif á næringarefni mjólkurinnar en hlutfall af D-3 vítamíni eykst í mjólkinni við meðhöndlunina/SS.