Meðalnytin í Svíþjóð er nú á leið niður eftir að hafa stigið hraustlega á undanförnum árum. Ársuppgjör skýrsluhaldsins liggur nú fyrir og er meðalnytin 9.468 kíló/árskú og lækkar meðalnytin um 18 kíló frá fyrra ári. Þá hefur kúm í Svíþjóð jafnframt fækkað um 3,3% eða um 9.531 kú sem hangir saman við þá staðreynd að kúabúum er að fækka en alls hurfu úr framleiðslu 320 kúabú á síðasta ári og voru í ársbyrjun komin niður í 4.302. Þrátt fyrir fækkun kúa á landsgrunni hafa kúabúin stækkað aðeins frá fyrra ári en

 

meðalstærð kúabúa í Svíþjóð nú eru 64,1 kýr, sem er aukning um 2,4 kýr frá fyrra ári.

 

Meðalafurðir ólíkra kúakynja eru nokkuð breytilegar en Holstein kýrnar hafa þar mikla yfirburði með meðalnyt upp á 9.782 kíló af orkuleiðréttri mjólk, sem er aukning um 14 kíló frá fyrra ári. SRB (rauðar sænskar) koma næst á eftir með 9.201 kíló af orkuleiðréttri mjólk en í þeim stofni varð veruleg afurðaminnkun eða heil 63 kíló. Jersey kýrnar koma næstar þar á eftir með 8.508 kíló af orkuleiðréttri mjólk en SKB kýrnar (sænska fjallakynið) rekur lestina með 5.800 kíló af orkuleiðréttri mjólk.