Beint í efni

Matvælaráðuneytið greiðir út viðbótargreiðslur

11.01.2024

Í vikunni greiddi Matvælaráðuneytið út viðbótargreiðslur til 484 kúabænda. Samtals voru greiddar út 500 m. kr. Greitt var í samræmi við innvegið magn mjólkur fyrstu ellefu mánuði ársins 2023. Skilyrði fyrir greiðslunum var jafnframt að mjólk hafi verið framleidd í nóvember 2023.

Fram kemur að greiðslurnar séu hluti viðbótarstuðnings samkvæmt tillögu meirihluta fjárlaganefndar Alþingis, og byggir á greiningu ráðuneytisstjórahóps þriggja ráðuneyta; matvælaráðuneytis, fjármála- og efnahagsráðuneytis og innviðaráðuneytis. Hópurinn var skipaður í lok október vegna erfiðrar fjárhagsstöðu bænda.

Í desember sl. var einnig greiddur viðbótarnýliðunarstuðningur til ungbænda, viðbótarfjárfestingastuðningur í sauðfjárrækt og nautgriparækt, viðbótarbýlisstuðningur til sauðfjárbænda og viðbótargripagreiðslur á holdakýr. Samtals hafa því verið greiddar 2.100 m.kr. til bænda á grundvelli tilllagna ráðuneytisstjórahópsins.

Svandís Svavarsdóttir matvælaráðherra sagði að „Með tillögum ráðuneytisstjórahópsins og viðbótum frá meirihluta fjárlaganefndar sýna stjórnvöld að þau standa með landbúnaði á krefjandi tímum“ og bætti síðan við að „Stærsta hagsmunamál næstu mánaða fyrir samfélagið og þar með talda bændur er að ná verðstöðugleika þannig að forsendur skapist fyrir lægri vöxtum“.