Þegar offramleiðsla mjólkur í Evrópusambandinu náði hámarki fyrr í ár með tilheyrandi lágu afurðastöðvaverði, var sett í gang sérstakt átaksverkefni til þess að draga úr framleiðslu mjólkur. Þetta verkefni gekk út á að bjóða sérstaka styrki til þeirra bænda sem vildu draga úr framleiðslu sinni miðað við fyrra ár og á það við um síðasta ársfjórðung þessa árs. Þeir bændur sem framleiða minna í ársfjórðinginum nú miðað við árið 2015 fá einfaldlega styrk á hvert kíló mjólkur sem um munar, alls 20 krónur á kílóið.

Nú er umsóknartími kúabændanna liðinn og liggur því fyrir hve margir sækja um í hverju landi. Afar misjafnt er á milli landa hve sótt er í þessa leið en t.d. sóttu 530 sænskir kúabændur um þennan styrk og 411 danskir. Fjöldi þessara bænda svarar til um 10% allra framleiðenda landanna. Þegar bændurnir sóttu um þurfti að gefa upp hve mikið þeir ætluðu að draga saman framleiðsluna og var það frá örfáum prósentum upp í 50%. Flestir þó nokkuð óverulega og t.d. sóttu dönsku bændurnir um  styrk fyrir tæplega 40 milljón lítra minni framleiðslu, þó það sé mikið magn á okkar mælikvarða er það ekki nema rétt um 0,5% af dönsku framleiðslunni. Í Frakklandi sóttu mun fleiri bændur um, eða nærri 25% allra framleiðenda. Í Belgíu sótti nærri þriðji hver bóndi um þennan styrk og í Þýskalandi um 10% líkt og í Svíþjóð og Danmörku/SS.