Niðurstöður skýrsluhaldsins fyrir apríl 2011 eru nú komnar út hjá Bændasamtökunum. Alls komu 603 bú til uppgjörs sem eru hlutfallsleg skil upp á 94%, en 605 bú voru með í mánuðinum þar á undan. Fjöldi árskúa í þessum skýrsluskilum var 22.924 eða 37,0 árskýr að jafnaði á hvern skýrsluhaldshafa. Í mars sl. var meðalfjöldinn sá sami.

 

Þegar horft er til meðalafurðanna kemur fram að meðalafurðirnar halda áfram að hækka eða úr 5.328 kg í mars í 5.343 kg. Próteinhlutfallið var 3,35 og fituhlutfallið 4,20 og framleiðsla verðmætaefna því 403,4 kg. Sé horft til sambærilegra niðurstaðna í apríl í fyrra voru meðalafurðirnar þá 5.216 kg, próteinhlutfallið 3,40 og fituhlutfallið 4,20 og framleiðsla verðmætaefna því 396,4 kg. Afurðirnar eru því að aukast frá því fyrir 12 mánuðum um 2,4% (jukust um 4,8% frá mars 2010 – mars 2011), sem er mjög ánægjulegt. Framleiðsla verðmætaefna nær ekki að fylgja magninu eftir og nemur aukningin þar 1,8% enda próteininnihald mjólkurinnar í fyrra meira samkvæmt skýrsluhaldsniðurstöðum.

 

Samtals reiknast nú 15 bú yfir 7.000 lítra meðalnyt sem er fækkun um tvö bú frá því í mars.

 

– Mestar meðalafurðir búa með færri en 40 árskýr eru sem fyrr á Hraunhálsi (26,7 árskýr) en þar var meðalnytin 7.876 kg með 4,93% fitu og 3,38% próteini og magn verðmætaefna mjólkurinnar því að jafnaði 654 kg, sem er 3 kg hækkun frá því í mars.

 

– Mestar meðalafurðir búa með 40-80 árskýr eru sem fyrr í Kirkjulæk 2 (42,3 árskýr) þar sem meðalnytin reiknast nú 7.711 kg með 4,11% fitu og 3,48% prótein. Magn verðmætaefnanna í Kirkjulæk 2 eru því að jafnaði 585 kg, sem er lækkun um 2 kg. frá því í mars.

 

– Mestar meðalafurðir búa með fleiri en 80 árskýr eru sem fyrr í Gunnbjarnarholti (102,0 árskýr), en þar var meðalnytin 7.691 kg með 4,05% fitu og 3,43% prótein og magn verðmætaefna mjólkurinnar því 575 kg., sem er 1 kg lækkun frá því í mars.

 

Afurðahæsta kýr landsins (reiknað út frá kg mjólkur) heldur efsta sæti frá því í mars en það er kýrin Lýsa (undan Frísk) frá Stakkhamri 2 með 11.790 kg sl. 12 mánuði með 3,56% próteini og 4,35% fitu og verðmætaefnin því alls 932 kg. Í mars var Lýsa einnig hæst yfir landið en náði þá yfir 12 tonn í meðalafurðir 12 mánuðina þar á undan. Athyglisvert er að sjá að af 10 afurðahæstu kúm landsins eru fimm þeirra frá sama búinu, Gunnbjarnarholti sem bendir til geysilega jafnfra afurða þar á bæ.

 

Fram kemur í yfirliti BÍ að 4 kýr mjólkuðu yfir 11 þúsund kg og engin reiknast nú yfir yfir 12 þúsund kg. /SS

 

Allar nánari upplýsingar má lesa á upplýsingasíðu BÍ um skýrsluhaldið með því að smella hér.