Niðurstöður skýrsluhaldsins fyrir mars 2011 eru nú komnar út hjá Bændasamtökunum. Alls komu 605 bú til uppgjörs sem eru hlutfallsleg skil upp á 93%. Fjöldi árskúa í þessum skýrsluskilum var 22.901 eða 37,0 árskýr að jafnaði á hvern skýrsluhaldshafa. Í febrúar sl. var meðalfjöldinn heldur hærri eða 37,2 árskýr/skýrsluhaldshafa.

 

Þegar horft er til meðalafurðanna kemur niðurstaðan þægilega á óvart miðað við fyrri mánuði og hækkar verulega frá febrúar eða úr 5.295 kg í 5.328 kg. Próteinhlutfallið var 3,35 og fituhlutfallið 4,21. Sé horft til sambærilegra niðurstaðna í mars í fyrra voru meðalafurðirnar þá 5.082 kg, próteinhlutfallið 3,40 og fituhlutfallið 4,20. Afurðirnar eru því að aukast frá því fyrir 12 mánuðum um 4,8%, sem er mjög ánægjulegt, en framleiðsla verðmætaefna nær ekki að fylgja magninu eftir og nemur aukningin þar 4,3% og munar vissulega um próteinhlutfallslækkunina.

 

Samtals reiknast nú 17 bú yfir 7.000 lítra meðalnyt sem er aukning um eitt bú frá því í febrúar.

 

– Mestar meðalafurðir búa með færri en 40 árskýr eru sem fyrr á Hraunhálsi (26,6 árskýr) en þar var meðalnytin 7.865 kg með 4,90% fitu og 3,38% próteini og magn verðmætaefna mjólkurinnar því að jafnaði 651 kg, sem er 3 kg lækkun frá því í febrúar.

 

– Mestar meðalafurðir búa með 40-80 árskýr eru sem fyrr í Kirkjulæk 2 (42,7 árskýr) þar sem meðalnytin reiknast nú 7.708 kg með 4,13% fitu og 3,49% prótein og magn verðmætaefnanna því að jafnaði 587 kg, sem er aukning um 3 kg. frá því í febrúar.

 

– Mestar meðalafurðir búa með fleiri en 80 árskýr eru sem fyrr í Gunnbjarnarholti (102,9 árskýr), en þar var meðalnytin 7.712 kg með 4,04% fitu og 3,43% prótein og magn verðmætaefna mjólkurinnar því 576 kg., sem er 3 kg lækkun frá því í febrúar.

 

Afurðahæsta kýr landsins (reiknað út frá kg mjólkur) er nú ný í efsta sæti en það var kýrin Lýsa (undan Frísk) frá Stakkhamri 2 með 12.424 kg með 3,46% próteini og 4,32% fitu og verðmætaefnin því alls 967 kg. Í febrúar var Rót frá Syðri-Bægisá afurðahæst með 12.889 kg en lækkar um rúm 700 kg. á milli mánaða en heldur þó öðru sæti á landsvísu!

 

Fram kemur í yfirliti BÍ að 6 kýr mjólkuðu yfir 11 þúsund kg, þar af tvær yfir 12 þúsund kg. /SS

 

Allar nánari upplýsingar má lesa á upplýsingasíðu BÍ um skýrsluhaldið með því að smella hér.