Matvæla- og lyfjastofnun Bandaríkjanna, FDA, heimilaði nýverið notkun á nýju lyfi sem hefur reynst afar vel til þess að draga úr myndun á ammoníaki hjá nautgripum! Um er að ræða lyfið Experior frá lyfjafyrirtækinu Elanco en rannsóknir á notkun þess sýna að sé nautgripum gefið lyfið þá er myndun ammoníaks frá mykju nautgripanna minni en sé þeim ekki gefið þetta lyf. Ammoníak hefur sem kunnugt er neikvæð umhverfisáhrif en veldur einnig lyktarmengun, auk þess sem ammoníak veldur særindum í augum og öndunarvegi hjá bæði mönnum og dýrum sé það í miklu magni.

Þetta lyf var prófað á 4 þúsund nautgripum og kom í ljós að notkun þess hafði engin áhrif á gripina sem slíka né gæði eða öryggi afurðanna. Ekki kemur fram í fréttatilkynningu um bandaríska leyfið hvernig lyfið hefur þessi áhrif á ammoníakmyndunina né heldur hve mikið dregur úr myndun ammoníaks við notkun þess/SS.