Eins og sagt var frá hér á naut.is fyrr í vikunni, fer heimsmarkaðsverð á mjólkurvörum lækkandi. Þess sést nú staður í afurðaverði til bænda í nágrannalöndunum. Á myndinni hér að neðan má sjá þróun á mjólkurverði til félagsmanna í FrieslandCampina í Hollandi, frá ársbyrjun 2010 til maí 2012 en félagið gefur út mjólkurverð til bænda mánaðarlega. Eins og sjá má fór verðið hækkandi frá vormánuðum 2010 og til loka þess árs. Það hélst hátt allt síðast liðið ár, en hefur farið stöðugt lækkandi frá síðustu áramótum og sér ekki fyrir endann á þeirri þróun. Verðið í dag er 32,75 evrusent pr. kg mjólkur, eða um 53,50 kr. 

FrieslandCampina var til með samruna tveggja stórra mjólkursamlaga í Hollandi, Friesland Foods og Campina árið 2008. Það er eitt stærsta landbúnaðarsamvinnufélag í Evrópu, árið 2011 var velta þess 9,6 milljarðar evra (um 1.600 milljarðar króna), félagsmenn eru rúmlega 14.000 kúabændur og starfsmenn um 19.000./BHB