Eftir all nokkra ró á mörkuðum erlendis undanfarna mánuði virðist nú sem að helstu afurðafyrirtæki heims hafi tekið upp fyrri iðju á ný, þ.e. að kaupa upp minni afurðafélög. Í gær sögðum við frá Coca-Cola og uppkaupum í Nígeríu á stærsta afurðafélaginu þar en nú er það franski risinn Lactalis sem hefur keypt meirihluta hlutafjárins í Albalact, stærsta afurðafélaginu í Rúmeníu. Yfirtaka Lactalis á 70,3% hlut í Albalact er háð samþykki samkeppnisyfirvalda í Rúmeníu en Albalact var í eigu nokkurra fjárfestingafélaga frá bæði Rúmeníu og Kýpur.

 

Albalact var stofnað árið 1971, starfrækir þrjár afurðastöðvar í landinu og er með um 1.000 starfsmenn sem framleiða breytt úrval mjólkurvara eins og smjör, osta og jógúrt. Eins og áður segir er þetta umsvifamesta fyrirtækið á mjólkurvörumarkaðinum í Rúmeníu en alþjóðleg fyrirtæki hafa sýnt markaðinum í Rúmeníu mikinn áhuga, mögulega vegna lágs framleiðslukostnaðar mjólkurvara þar. Næst stærsta afurðafyrirtækið er í eigu franska fyrirtækisins Danone og þriðja stærsta afurðafyrirtækið í eigu hins nýsjálenska Fonterra/SS.