Fyrir sléttum tveimur mánuðum greindum við frá óförum sænsks kúabónda, sem lenti í því rétt fyrir jól að 69 kýr hans hurfu sporlaust úr fjósinu. Hér má smella til þess að lesa þá frétt. Eftir mikla eftirgrennslan hefur nú lögreglan handtekið bóndann sjálfan og við yfirheyrslur fengust það veigamiklar upplýsingar að lögreglan telur fullvíst að hann eigi aðild að málinu!

 

Það voru bæði ábendingar til lögreglunnar sem leiddu til handtökunnar, sem og sú staðreynd að bóndinn sagðist ekki hafa orðið var við það þegar kúnum var stolið um miðja nótt. Það þótti ótrúverðugt, enda þurfti til flutninganna amk. tvo stóra flutningabíla og fjölda manna auk þess að ólíklegt þykir að flutningarnir hafi getað farið hljóðlátt fyrir sig. Þar sem íbúðarhúsið var rétt við fjósið, hvar bóndi sagðist hafa sofið værum blundi, hafði lögreglan hann undir grun frá upphafi/SS.