Þegar kyngreint sæði kom fyrst á markað fyrir 10 árum síðan var frjósemin mun slakari við notkun á slíku sæði en hefðbundnu sæði og munaði þar all nokkru. Þessi munur hefur svo stigminnkað með bættri tækni og aukinni þekkingu á eiginleikum sæðis sem hefur verið kyngreint. Í danskri rannsókn, sem gerð var á grunni gagna frá árinu 2010, var þessi munur kominn niður í 10% þ.e. kýr sem sæddar voru með hefðbundnu sæði héldu heldur betur en hinar sem sæddar voru með kyngreindu sæði. Árið 2014 kom svo á markaðinn nýtt efni sem notað er til þynningar á kyngreindu sæði og eftir að það var tekið í almenna notkun hefur þessi munur minnkað enn frekar.

 

Ný rannsókn, frá þróunar og ráðgjafafyrirtækinu SEGES í Danmörku, sýnir nú að munurinn á hefðbundnu sæði og kyngreindu sæði er kominn niður í 6,6% og hafa nú danskir kúabændur stóraukið notkun á kyngreindu sæði þar sem munurinn er jafn lítill og raun ber vitni um. Kyngreint sæði er mest notað við sæðingar á kvígum en að jafnaði er fjórða hver kvíga í Danmörku sædd með kyngreindu sæði/SS.