Undanfarin ár hefur kúm í Kanada fækkað nokkuð jafnt og þétt, öfugt við það sem hefur gerst í mörgum öðrum löndum. Nú er svo komið að fjöldi kúa hefur ekki verið minni í 27 ár í Kanada og raunar er því spáð að fjöldi kúa fari úr 11.850.000 á þessu ári í 11.725.000 á næsta ári, þ.e. fækki um 125 þúsund á einungis einu ári! Nautgriparækt í landinu hefur dregist mikið saman á undanförnum áratugum og má því til stuðnings nefna að árið1945 voru t.d. 7 kýr á hverja 10 íbúa landsins en nú eru 3 kýr á hverja 10 íbúa, sem er þó þrefaldur fjöldi kúa pr. íbúa en er t.d. hér á landi.

Skýringin á þessari neikvæðu þróun felst fyrst og fremst í breyttum aðstæðum á markaði, breyttu veðurfari og því að æ erfiðara er fyrir bændur landsins að ráða til sín starfsfólk. Þess má geta að fækkunin á kúm kemur fyrst og fremst fram á holdakúm, þ.e. mjólkurkúm hefur ekki fækkað teljandi í samanburði við holdakýr/SS.