Samkvæmt nýjasta uppgjörinu sem bandaríska landbúnaðarstofnunin (USDA) hefur gefið út og inniheldur margskonar tölfræði um þarlendan landbúnað kemur m.a. fram að kúabúum hefur fækkað þar í landi afar hratt undanfarin ár. Í næst stærsta mjólkurframleiðslufylki Bandaríkjanna, Wisconsin, hefur þeim fækkað sér í lagi mikið og alls um 20% á síðustu fimm árum.

Í fyrsta skipti í sögunni er fjöldi kúabúa nú kominn undir 9 þúsund í fylkinu en þrátt fyrir fækkun búa er mjólkurframleiðslan í Wisconsin enn afar mikil og alls nam hún 13,5 millörðum kg á síðasta ári. Alls voru í Wisconsin fylki 1.278.000 mjólkurkýr í júlí sl. og er það næst mesti fjöldi kúa í einu fylki í Bandaríkjunum en flestar þeirra er að finna í Kalíforníufylki.

Í sama uppgjöri kemur fram að meðalnytin í Bandaríkjunum fyrir þetta ár stefnir í að fara í 10.500 kíló mjólkur á árskúna, en árið 2016 var ársframleiðslan að jafnaði 10.330 kg samkvæmt skýrslunni/SS.