Undanfarna tvo áratugi hefur kúabúum í Japan fækkað um 60% og til að setja hlutfallið í samhengi svarar það til þess að á degi hverjum síðustu tuttugu ár hafi 3 kúabú hætt framleiðslu. Samkvæmt skýrslu landbúnaðarráðuneytisins í Japan er skýringin á fækkuninni erfitt starfsumhverfi á kúabúum í Japan sem hefur valdið því að kynslóðaskipti hafa verið afar fátíð undanfarið og búunum því lokað þegar fólk er komið á aldur.

Samkvæmt sömu skýrslu var fjöldi japanskra kúabúa 37.400 árið 1998 en í árslok 2018 var fjöldinn kominn niður í 15.700. Þessi mikla fækkun búanna í Japan hefur valdið því að framleiðslan hefur dregist saman um 15% á þessum tveimur áratugum eða úr 8,6 milljörðum lítra í 7,3 milljarða lítra/SS.