Þrjú nýjustu kúabú nýsjálenska félagsins Fonterra eru af stærri gerðinni en þar eru alls 30 þúsund gripir og þar af eru mjólkurkýrnar 16 þúsund. Kúabúin þrjú eru í nágrnni við Bejing í Kína en við höfum áður greint frá áhuga nýsjálensku kúabændanna um að byggja upp framleiðsluaðstöðu í Kína. Framangreind þrjú bú eru öll nálægt hvert öðru og nýta sameiginlega starfsfólk og hluta af tækjum, svo nánast má tala um búin þrjú sem eitt.

Hjá búunum þremur starfa í dag 400 starfsmenn og 85% alls fóðurs sem notað er á búunum er ræktað á staðnum. Þegar framleiðslan verður komin á eðlilegt ról er áætlað að búin framleiði 150 milljónir lítra mjólkur á ári, sem er þó ekki nema 375 þúsund lítra mjólkur á hvert ársverk. Þess má geta að það flokkast sem afar slök afköst í Danmörku, þar sem miðað er við að ársverkið eigi að geta skilað 1 milljón lítra.

Fonterra hefur áður gefið út að félagið ætli að stórauka framleiðslu sína í Kína og er stefnt að því að árið 2018 verði innvigtun félagsins í Kína komin í 1 milljarð lítra á ári/SS.