Aðalfundur Landssambands kúabænda, sem nú stendur yfir á Hótel Selfossi, samþykkti rétt í þessu ályktun þess efnis að halda skyldi í framleiðslustýringu í greininni í formi greiðslumarks.

Í nýjum búvörusamningum, sem tóku gildi 1. janúar 2017, segir að við endurskoðun 2019 skuli taka afstöðu til hvort kvótakerfi í mjólkurframleiðslu verði afnumið frá og með 1. janúar 2021. Verði niðurstaðan sú að afnema ekki kvótakerfið mun framhald þess byggjast á grunni fyrra kerfis. Við endurskoðunina 2019 munu Bændasamtök Íslands láta fara fram atkvæðagreiðslu meðal mjólkurframleiðenda um hvort kvótakerfi í mjólkurframleiðslu skuli afnumið.

Ályktunin hljómar svo: „Aðalfundur Landssambands kúabænda haldinn á Selfossi 6. – 7. apríl 2018 ályktar að halda skuli í framleiðslustýringu í formi greiðslumarks í mjólkurframleiðslu. Hámark skuli sett á verð greiðslumarks og viðskipti með greiðslumark skuli fara fram í gegnum opinberan aðila. Fundurinn beinir því til stjórnar að greina hvaða leiðir séu skilvirkastar í þeim efnum.“

Á fundinum sitja 26 fulltrúar sem kosnir eru á aðalfundum aðildarfélaga Landssambands kúabænda. Ályktunin var samþykkt samhljóða.