Beint í efni

Kúabændur mótmæltu í London

17.07.2012

Síðasta miðvikudag héldu rúmlega 2.500 kúabændur til London þar sem þeir stóðu fyrir mótmælafundi vegna stöðgt lækkandi afurðastöðvaverðs á mjólk. Að mótmælafundinum komu bændur frá öllu Stóra-Bretlandi og voru forsvarsmenn mótmælanna afar ánægðir með þátttöku kúabændanna, sér í lagi þeirra sem komu um langan veg s.s. frá Skotlandi og Norður-Írlandi.

 

Skilaboð fundarins voru skýr, ef afurðastöðvaverð mjólkur hækkar ekki fyrir 1. ágúst nk. þá munu samtök kúabænda standa fyrir  mótmælum við afurðastöðvar og verslanir sem selja mjólk á verði sem er undir framleiðslukostnaði mjólkurinnar. Jafnframt mun á sama tíma hefjast markaðsherferð bændanna sem beint er til neytenda þar sem þeim skilaboðum er komið skýrt á framfæri að með því að kaupa mjólk og mjólkurvörur undir frarmleiðslukostnaði varanna séu neytendur að grafa undan landbúnaðinum.

 

Á mótmælafundinn mætti landbúnaðarráðherra Stóra-Bretlands, Jim Paice, sem fékk reyndar ekki sérlega blíðar móttökur bændanna þegar hann velti því upp hvort öruggt væri að kúabændurnir væru búnir að gera allt sem í þeirra valdi stæði til þess að skera niður kostnað og hámarka framleiðsluna. Hann kallaði jafnframt eftir því að bændur stæðu betur saman í framleiðendafélögum, sundrungin og sjálfstæðið hafi leitt mjólkurframleiðendurna í þá stöðu að verslanir í raun ákveði hvaða verð bændur fái fyrir mjólkina. Þetta sé þó að breytast með stærri afurðafélögum í eigu bændanna sjálfra.

 

Allar þrjár stærstu afurðastöðvarnar í Stóra-Bretlandi hafa nú tilkynnt lækkun á afurðastöðvaverði þann 1. ágúst nk./SS.