Í liðinni viku stóðu kúabændur víða í Evrópu fyrir mótmælum vegna lágs afurðastöðvaverðs, en margir eru nú einungis að fá um 40-42 krónur fyrir líterinn nú um stundir og sumir enn minna eins og á Spáni þar sem afurðastöðvaverðið er líklega lægst eða 30,8 krónur á líterinn! Kúabændurnir hafa fengið yfir sig nóg af ástandinu og hefur því víða komið til mótmæla.

 

Á Spáni, nánar tiltekið í Galaciu, mótmæltu kúabændur á laugardaginn og óku hundruðum dráttarvéla um götur. Þetta eru einungis fyrstu mótmælin af mörgum sem eru skipulögð á Spáni.

 

Í Frakklandi sýndu kúabændur einnig hug sinn í verki með því að aka vélum sínum fyrir innganga á verslunum sem selja mjólk allt of lágu verði.

 

Á Norður-Írlandi voru svipaðar aðgerðir í gangi en þar stóðu kúabændur fyrir mótmælum utan við algengar stórverslanir.

 

Í Englandi stóðu kúabændur einnig í mótmælum en þeirra aðgerðir voru áhugaverðar og fólust í því að þeir tæmdu alla mjólkurkæla verslana sem selja ódýra mjólk. Mjólkina settu bændurnir í körfur og fóru með að verslunarkössunum, en keyptu svo ekki mjólkina og skildu eftir þar.

 

Hvert stefnir er erfitt að segja fyrir um en í Belgíu hafa verið stigin áhugaverð skref þar sem fulltrúar kúabænda og stórverslana hafa tekið sig til og leita sameiginlegra leiða til þess að laga ástandið. Ekki eru margir trúaðir á að þetta skili einhverju en vissulega áhugaverð leið, enda þessir aðilar ekki alltaf sammála rétt eins og hérlend dæmi sýna/SS.