Bændur í Sviss hafa upplifað töluvert miklar breytingar á framleiðsluumhverfinu sínu undanfarið. Lágt afurðastöðvaverð hefur verið þeim afar erfitt og þar sem markaðurinn í Sviss er töluvert opinn hefur samkeppnisstaða þeirra verið þung, enda með afar kostnaðarsama framleiðslu á litlum býlum í fjalllendi Sviss. Á móti hefur svo komið að veðurfarsbreytingar undanfarinna ára hafa gert það að verkum að vaxtartímabilið hefur lengst og því hægt að beita kúm í lengri tíma en áður, en minni úrkoma hefur þó sett beit kúnna einnig í uppnám.

Til þess að takast á við breyttar aðstæður hefur kúabændunum í Sviss verið ráðlagt að vinna meira saman og að nýta land sitt betur svo hugsanleg þurrkatímabil muni ekki hafa neikvæð áhrif á fóðurframleiðsluna. Takist kúabændunum að læra að vinna með breyttu veðurfari og nýta beitina rétt liggur fyrir að skamkeppnisstaða kúabúanna styrkist enda verður þá minni þörf fyrir aðkeypt innflutt fóður/SS