Beint í efni

Kúabændur í Mississippi í vanda

06.07.2012

Í Mississippi í Bandaríkjunum hefur meðalnyt kúa aukist verulega ár árinu vegna milds vetrar og góðra aðstæðna til beitar í vor. Þrátt fyrir það berjast kúabúin í bökkum vegna mikils framleiðslukostnaðar, sem hefur ekki verið hærri í áratugi. Á sama tíma hefur afurðastöðvaverð fallið um 21% miðað við sama tíma í fyrra, en skýringin á því felst í mikilli mjólkurframleiðslu sem hefur þrýst verðinu niður.

 

Síðustu ár hafa verið bandarískum kúabændum afar erfið en margir urðu gjaldþrota árið 2009 í kjölfar efnahagshrunsins. Þeir sem þó lifðu af hafa áttu í afar erfiðum rekstri bæði árið 2010 og 2011 og nú stefnir í enn eitt árið með erfiðum rekstri. Afurðastöðvaverð meðalmjólkur í Mississippi er nú 1,51$ á gallonið sem svarar til um 50,6 íkr/líterinn.

 

Árið 2007 voru 178 kúabú í fylkinu en 1. janúar sl. voru þau orðin 109 og taka tvær afurðastöðvar við mjólk frá þessum kúabúum. Kýrnar í fylkinu eru frekar afurðalágar vegna erfiðra veðurfarsaðstæðna (hiti). Meðalnyt þeirra er um 6.600 kg en meðalnyt allra kúa í Bandaríkjunum er hinsvegar 9.500 kg árlega/SS.