Ung dönsk stúlka, Emma Weiss Nielsen, vann nýverið til nýsköpunarverðlauna í Danmörku fyrir þróun á hugbúnaði sem spilar sérstaka tónlist fyrir kýr í mjaltaþjóni. Þessi unga stúlka hafði heyrt um rannsóknir á samhengi afurðasemi kúa og tónlistar og prófaði margskonar mismunandi tónlist á kúabúi með mjaltaþjóna. Hún komst að því að með því að spila tónlist sem er róleg en skiptir oft um takt þá koma kýrnar oftar í heimsókn í mjaltaþjóninn. Hún prófaði m.a. rússneska þjóðlagatónlist, simfóníur og allt þar á milli og í kjölfarið hefur hún þróað sérstakan hugbúnað sem býr til sérstök hljómföll sem henta sérstaklega fyrir kýr!

Þessi magnaða stúlka hefur þegar fengið mikla athygli heima fyrir og heldur nú á Evrópumót ungs hugsvitsfólks, þar sem keppt er um Evrópubikarinn í uppfinningum/SS.