Á heimasíðu Felleskjøpet, sem er stærsti framleiðandi á kjarnfóðri í Noregi, má finna verðlista yfir kjarnfóðurblöndur. Nýjasta verðlistanum, sem gildir fyrir júnímánuð 2007 hefur verið fundinn staður á kjarnfóðursíðu naut.is og umreiknaður m.v. gengi norsku krónunnar í dag, sem er um 10,65 kr.

Það skal viðurkennt að samanburðurinn á kjarnfóðurverði milli landa er óhagstæður. Verð á blöndum á borð við Formel Favør 40, blanda sem hentar við algengar aðstæður, er 27,24 kr/kg. Formel Super, sem er blanda fyrir mjög hámjólka kýr sem fá 17-18 kg kjarnfóðurs á dag, kostar 29,79 kr. Þetta verð gildir fyrir meðlimi í FK en er án afsláttarkjara. Lægsta verð á svipuðum blöndum hér á landi er 9-11 kr hærra pr. kg., þ.e. með afsláttarkjörum. Verðmunurinn er því á bilinu 30-35%.

 

Ef tekið er mið að blöndum sem farið var að bjóða á markaði hér í vor, en engar upplýsingar hafa fengist um hvernig seljast þó eftir þeim hafi verið leitað, þá er munurinn 3-7,5 kr kg, eða 10-20%. Þær blöndur eru án fiskimjöls.

 

Samkvæmt upplýsingum frá FK notar fyrirtækið fiskimjöl í sínar blöndur, líkt og tíðkast hér á landi. Magnið er þó takmarkað, vegna þess hve verðið á fiskimjölinu er hátt.

 

Þó ber að geta þess að viðskiptakjör FK eru með þeim hætti að fyrirtækið er nánast skyldað til að kaupa hráefni í kjarnfóðrið innanlands, á mun hærra verði en hægt væri að nálgast það t.d. í Danmörku eða annars staðar, þar sem tollar eru lagðir á hráefni til kjarnfóðurgerðar í Noregi. Hér á landi eru engir tollar á slík hráefni, þeir voru afnumdir 1. júlí 2006.