Geno, ræktunarfélag norskra kúabænda, hefur nú fengið leyfi til þess að selja sæði til Kína og er þetta afar stór áfangi fyrir frændur okkar Norðmenn. Ferlið, að fá samþykki til innflutnings á sæði til Kína, hefur tekið mörg ár og hefur þetta verið bæði flókið og umfangsmikið verkefni sem Geno fór í gegnum til þess að fá þetta mikilvæga leyfi. Sæðið flytur Geno til Kína með dótturfélaginu Geno Global AS, en það félag er í dag með starfsemi í rúmlega 30 löndum.

Markaðurinn í Kína er hreint ekki auðveldur enda hefur mjólkurverð þar lækkað um 20-30% á liðnum árum vegna mikils innflutnings á mjólkurvörum frá öðrum löndum sem hefur þrýst afurðastöðvaverði í Kína niður. Þetta telja þó forsvarsmenn Geno hagstætt fyrir norska sæðið enda NRF kúakynið sterkt og stendur vel fyrir sínu í samkeppninni við hið algenga Holstein kúakyn.

Nú fyrir áramótin fara 20 þúsund skammtar til Kína og þess er svo vænst að á næsta ári verði fluttir 100 þúsund skammtar til landsins og verður Kína þá stærsti móttakandi á sæði frá Geno. Hlutur Geno verður þó ekki sérlega stór í Kína, en þarlendur markaður notar árlega 25-30 milljónir stráa á ári og þar eru í dag starfræktar 30 nautastöðvar og auk þess er töluvert flutt inn af sæði til landsins/SS.