Írska fyrirtækið Keenan, sem  margir kúabændur hér á landi kannast við enda þekktur framleiðandi á heilfóðurvögnum, ætlar sér stóra hluti á komandi misserum en fyrirtækið hefur nú gert samkomulag við hátæknifyrirtækið Intel. Samstarf fyrirtækjanna er einkar áhugavert og byggir á því að hver einasti heilfóðurvagn verður nettengdur og mun senda upplýsingar jafn óðum og fóður er sett í hann upp í “ský” og þar tekur Intel við gögnunum og kemur þeim áfram til fóðursérfræðinga.

 

Fóðurblöndunin verður þar með tölvutengd sérfræðingum í rauntíma og fá bændur því jafnharðan upplýsingar um rétta blöndun og/eða betri uppskriftir að blöndu fyrir kýrnar sé talin ástæða til þess. Samstarfi Keenan og Intel er þannig ætlað að auðvelda kúabændum að fóðra kýrnar kórrétt á hverjum tíma og verður fróðlegt að fylgjast með því hvernig þetta kerfi mun í raun koma út. Fyrstu vagnarnir frá Keenan sem verða útbúnir með tölvubúnaði frá Intel eru væntanlegir á markað innan skamms/SS.