Norsku kúabændurnir geta nú verslað sæði úr nautum í netverslun GENO en í netversluninni er bæði boðið upp á kyngreint sæði úr NRF nautum og upp á holdanautasæði. Tilgangurinn með þessu er augljós, þ.e. að auðvelda bændum að velja naut sem henta ræktunarstefnu viðkomandi kúabús auk þess sem þetta gerir GENO auðveldara fyrir með að birgja frjótæknana upp með réttum sæðisskömmtum enda er bæði kyngreint sæði og holdanautasæði sk. sérvara og því liggja frjótæknar ekki með þessi strá að jafnaði.

Í netverslun GENO geta viðskiptavinirnir keypt bæði sæði úr NRF nautum en einnig innflutt sæði s.s. úr öðrum rauðum nautum frá kynbótafyrirtækinu Viking. Þá býður GENO upp á sæði úr Holstein, Brown Swiss, Jersey og Fleckvieh auk þess að hægt er að fá strá úr einhverju af hinum 7 gömlu norsku ræktunarlínum sem væntanlega tengjast okkar íslenska kyni meira en önnur. Hafi norskur kúabóndi holdakýr eða áhuga á blendingsrækt getur hann valið úr 10 ólíkum ræktunarlínum, allt frá Aberdeen Angus og niður í Dexter og allt þar á milli. Að síðustu er boðið upp á sæði sem er framleitt með SpermVital, sem er sérstök aðferð sem eykur endingu sæðisins og þar með meiri líkur á því að kýrin festi fang við sæðinguna.

Hægt er að kynna sér þessa skemmtilegu nýjung frænda okkar í Noregi með því að fara inn á vefverslun þeirra með því að smella hér. Þau naut sem eru með grænu merki eru þau sem eru fáanleg í netversluninni og ef bóndi pantar á netinu er það mun ódýrara en ef hann hringir í GENO, svo þetta er leið fyrir norsku bændurna til þess að spara. Að gefnu tilefni er rétt að taka fram að GENO sendir ekki sæði til Íslands/SS.