Það kemur trúlega fáum á óvart að rannsókn hafi sýnt að smákálfar velja þurrt og mjúkt undirlag, þegar þeir velja sjálfir – en þó er alltaf gott að fá vísindalegar staðfestingar á góðum vinnureglum og hefðum. Frá þessari niðurstöðu er greint í helsta vísindatímariti heimsins á sviði nautgriparæktar, Journal of Dairy Science en rannsókn var gerð á Holstein smákálfum í Kanada og þeim gefið færi á að velja mismunandi undirlag til þess að liggja í.
 
Rannsóknin var á margan hátt athyglisverð þar sem kálfarnir gátu valið um að liggja á þurru sagi (90% þurrt), hálfblautu sagi (74% þurrt) og allt niður í það að liggja í rennblautu sagi (29% þurrt). Kálfarnir völdu alltaf þurrt undirlag ef það var í boði. Þegar þeir gátu hinsvegar ekki valið um mismunandi undirlag kom berlega í ljós hve ríka leguþörf smákálfar hafa. Að jafnaði lágu kálfarnir 17 klukkustundir á dag, jafnvel þótt undirlagið væri rennblautt. Niðurstöðurnar sýna enn á ný hve ríka leguþörf smákálfar hafa og að ef þeir fengu að ráða væri legusvæðið alltaf þurrt/SS.