Júgurbólga og frjósemisvandamál hjá kúm eru án nokkurs vafa þau vandamál sem kosta kúabændur um allan heim lang mest og slakur árangur veldur umfangsmiklu tapi kúabúa. Þetta var umtalsefni á árlegum fundi um frjósemi nautgripa sem haldinn var í Reno í Bandaríkjunum fyrr í þessum mánuði. Þar kom fram, í máli vísindafólks frá háskólanum í Wisconsin-Madison í Bandaríkjunum með hina þekktu internetstjörnu Pamelu Ruegg í broddi fylkingar, að þó svo að fæstir tengi beint saman júgurbólgu- og frjósemisvandamál þá sé tilfellið að afar margt sé skylt með þessum tveimur vandamálum.

Pamela benti m.a. á að margar rannsóknaniðurstöður sýndu að júgurbólgusýking getur haft neikvæð áhrif á náttúrulegt gangmál kúnna, haft hamlandi áhrif á frjósemina þrátt fyrir egglos og jafnvel ýtt undir fósturlát. Skýringarnar á þessu samhengi má rekja til líffræðilegra varna líkamans þegar hann ræðst á sýkingarvald júgurbólgunnar. Þetta samhengi þessara tveggja kvilla er sterkast á tímabilinu frá sæðingu þar til fang hefur verið fest og sýna rannsóknir að bæði sýnileg og dulin júgurbólga geta hæglega haft þessi neikvæðu áhrif á frjósemina.

Með öðrum orðum má segja að ef tekist er tímanlega á við bæði dulda og sýnilega júgurbólgu og unnið að því að draga úr tíðni þeirra með markvissum hætti getur auka ávinningur þeirrar vinnu verið bætt frjósemi.

Byggt á umfjöllun um efnið í nóvemberhefti tímaritsins Hoard‘s Dairyman/SS.