Stjórn Auðhumlu hefur ákveðið að lækka sérstakt innvigtunargjald frá 1. febrúar 2017 úr 35 krónum í 20 krónur. Þessi ákvörðun er tekin í ljósi fyrirliggjandi gagna um þróun innvigtunar og fjölda gripa. Þetta kemur fram í tilkynningu frá Auðhumlu.

Í október sl. ákvað stjórn Auðhumlu að fyrirkomulag á greiðslum fyrir umframmjólk 2017 yrði óbreytt frá því sem hafði verið árið 2016. Það þýddi að frá 1. janúar var áfram greitt fullt verð fyrir alla innlagða mjólk með tilliti til verðefna og gæða en sérstakt innvigtunargjald hækkaði í kr. 35.- á hvern lítra mjólkur umfram greiðslumark. Þá var tekið fram að innvigtunargjaldið yrði endurskoðað mánaðarlega og gæti hækkað eða lækkað eftir aðstæðum og því hvernig framleiðsla og sala þróast. Ástæður fyrir sérstöku innvigtunargjaldi eru þær að Auðhumla er að greiða hærra verð til innleggjenda en fæst við sölu þessarar mjólkur, samkvæmt tilkynningu.

Nánar er farið yfir forsendur lækkunar innvigtunargjalds í tilkynningu frá stjórnarformanni um framleiðslu og sölumál 2016 og horfur 2017 sem birtist á vef Auðhumlu í dag.