Hörður Sigurgrímsson fyrrverandi bóndi í Holti í Flóa og fyrsti formaður Landssambands kúabænda lést þann 9. júní sl. Hann var fæddur þann 29. júní 1924. Hörður rak stórt og myndarlegt kúabú í Holti með bræðrum sínum Jóni og Vernharði, um áratuga skeið. Hann var kjörinn fyrsti formaður Landssamband kúabænda á stofnfundi samtakanna þann 4. apríl 1986. Var til hans leitað að gegna formennsku í LK og til að móta starf samtakanna á miklum umbrotaárum og átakatímum í mjólkurframleiðslunni hér á landi. Nýttust mannkostir hans vel í því umróti. Hann hélt staðfastlega fram afstöðu landssambandsins um málefni kúabænda en átti jafnframt farsælt samstarf við önnur samtök og fyrirtæki bænda. Gegndi hann formennsku til ársins 1989. Hörður var einnig í stjórn Mjólkurbús Flóamanna frá 1973 til 1994, þar af var hann stjórnarformaður fimm síðustu árin. Eftirlifandi eiginkona hans er Anna Guðrún Bjarnardóttir. Landssamband kúabænda sendir fjölskyldu Harðar Sigurgrímssonar innilegustu samúðarkveðjur, með þökkum fyrir gott starf í þágu samtakanna og íslenskra kúabænda.

 

Baldur Helgi Benjamínsson, framkvæmdastjóri LK.

 

 

Hörður Sigurgrímsson. 1924-2011