Beint í efni

Hollenskar kýr skulu ropa minna árið 2020

24.10.2014

Kýr framleiða mikið metangas með ropa sínum, en sem kunnugt er þá er metangas afar mengandi fyrir umhverfið og hefur til að mynda 25 sinnum meiri hitamyndandi áhrif á jörðina en sambærilegt magn koltvísýrings. Hollenska ríkisstjórnin hefur nú skorið upp herrör gegn losun sk. gróðurhúsaloftegunda og hefur ákveðið að árið 2020 eigi losunin að vera 30% minni en hún var árið 2013. Er þar meðal annars horft til nautgriparæktarinnar í Hollandi, sem sannarlega á hlut í þessari losun og þá sérstaklega mjólkurkýrnar. Vísindamenn hafa því fengið það verðuga verkefni að fá kýrnar til þess að ropa minna eftir sex ár en þær gera í dag!

 

Hvernig þeir ætla að gera það er svolítið óljóst enn sem komið er en bæði er horft til áhrifa mismunandi fóðurefna á framleiðslu metangassins en einnig hvort erfðir hafi þarna áhrif einnig. Þá er horft til samsetningar örvera í vömb mjólkurkúnna og hvort breyta megi hlutfalli þeirra í þágu minni framleiðslu metangass án þess að það hafi áhrif á afurðasemi kúnna. Vísindafólk í öðrum löndum fylgjast náið með starfinu, enda ljóst að ef þetta tekst hjá hinum hollensku fræðimönnum þá verður vandræðalítið að yfirfæra þá þekkingu yfir til annarra landa í heiminum/SS.