Í ár er gert ráð fyrir að nokkuð miklar breytingar verði á heimsmarkaðinum með nautakjöt, m.a. vegna breytinga á veðurfari í heiminum. Flóð og þurrkar hafa haft margvísleg áhrif á framleiðsluaðstæður víða og við blasir nokkuð breytt mynd í nautgriparæktinni, rétt eins og í kornræktinni sem naut.is hefur áður greint frá. Þannig er ætlað að framleiðsla nautgripakjöts í Suður-Ameríku dragist verulega saman í ár en framleiðsla í Indlandi aukist að sama skapi.

 

Bandaríska landbúnaðarráðuneytið hefur nú birt spá um stöðuna á heimsmarkaði með nautakjöt árið 2011 (kjöt af buffalóum inni í öllum tölum), en slík spá er birt tvisvar á ári. Þrátt fyrir töluverðar breytingar á markaðinum er Brasilía enn á toppi listans yfir útflutningslönd en bilið yfir í Ástralíu er orðið stutt eða rétt um 250 þúsund tonn. Fjórum löndum er spáð því að flytja út meira en eina milljón tonna á þessu ári en það eru Brasilía, Ástralía, Indland (líklega mikið buffalóakjöt) og Bandaríkin. Þessi fjögur lönd eru með um 50% af heimsmarkaðinum í nautakjöti sem talinn er nema um 7.747 þús. tonnum (sjá töflu I hér fyrir neðan).

 

Í sömu spá bandaríska ráðuneytisins kemur fram áætlun um innflutning landa og þar vekur etv. mesta athygli spá þess eðlis að Bandaríkin verða nettó útflytjendur á nautakjöti í ár ef spá þessi gengur eftir og er það í fyrsta skipti í afar langan tíma sem slíkt gerist. Evrópusambandslöndin eru hinsvegar, sem fyrr, nettó innflytjendur á nautakjöti (sjá töflu II hér fyrir neðan)/SS.

 

Tafla I. Spá um útflutt nauta- og buffalóakjöt á heimsmarkaðinum árið 2011*

	Þúsund tonn
Brasilía	1.600
Ástralía	1.350
Bandaríkin	1.123
Indland	1.000
Kanada	525
Nýja-Sjáland	478
Úrúgvæ	350
Paragvæ	310
Evrópusambandslöndin	295
Argentína	270
Mexíkó	120
Önnur lönd	326
Samtals	7.747

 

Tafla II. Spá um innflutt nauta- og buffalóakjöt á heimsmarkaðinum árið 2011*

	Þúsund tonn
Bandaríkin	1.014
Rússland	900
Japan	725
Evrópusambandslöndin	450
Suður-Kórea	400
Íran	325
Mexíkó	300
Víetnam	275
Kanada	240
Egyptaland	220
Chíle	200
Önnur lönd	1.852
Samtals	6.901

* Heimild: USDA