Á GDT (Global Dairy Trade) uppboðsmarkaðinum í gær varð 3,4% verðhækkun og hefur verðið nú hækkað fimm sinnum í viðskiptum með mjólkurvörur síðustu þrjá mánuði en í tveimur viðskiptum varð verðlækkun. Alls nam salan í gær 24 þúsund tonnum og stendur nú GDT verðstuðullinn í 697 stigum og er heimsmarkaðsverð mjólkurafurða þar með áþekkt því sem það var í kringum áramótin.

 

Þó svo að hækkun hafi nú orðið á ný er enn langt þar til heimsmarkaðsverðið nái fyrri hæðum. Enn er framboð á mjólk frá kúabúum heimsins afar mikið og erlendis fer fram hörð barátta á milli helstu afurðastöðva á útflutningsmarkaði. Næsti uppboðsmarkaður verður haldinn eftir hálfan mánuð og skýrist þá frekar hvert stefnir. Verði þróunin svipuð og síðasta ár er ekki ástæða til bjartsýni, en sumarið 2015 varð samfelld lækkun á markaðinum frá júní og fram í miðjan ágúst, sem endaði með lægsta heimsmarkaðsverði mjólkurafurða í heilan áratug/SS.