Beint í efni

Heildarsala kjöts heldur áfram að aukast

18.06.2012

Bændasamtökin hafa nú tekið saman nýjar framleiðslu- og sölutölur kjötgreina fyrir maí. Í samantektinni kemur fram að sala á nautgripakjöti í mánuðinum var 0,4% minni en hún var í sama mánuði í fyrra og að ársfjórðungssalan hafi verið 0,6% minni. Þó er nú árssalan, þ.e. salan sl. 12 mánuði, 4.012 tonn sem er aukning um 4,8% miðað við síðustu 12 mánuðina þar á undan, sem skýrist af góðri sölu fyrr á árinu.

 

Heildarframleiðsla nautgripakjöts sl. 12 mánuði var 4.012 tonn, en framleiðslan í mánuðinum var 327 tonn og nam sala nautgripakjöts í mánuðinum 333 tonnum. Sé horft til sundurliðunar á sölu nautgripakjöts í mánuðinum var sem fyrr mest sala í ungnautakjöti eða 184 tonn og á 12 mánaða grunni nemur ungnautakjötssalan 2.280 tonnum eða 56,8% af heildarsölunni. Sala á kýrkjöti síðustu 12 mánuði var 1.477 tonn eða sem nemur 36,8 af heildarsölunni.

 

Sé litið til annarra kjöttegunda kemur fram í samantektinni að heildarsalan á landinu öllu hefur aukist sl. 12 mánuði um 1,4%. Mest er sem fyrr salan á alifuglakjöti eða 7.417 tonn (30,9%) og þar á eftir kemur lamba- og kindakjöt með 6.440 tonn eða 26,9% markaðshlutdeild. Sala á svínakjöti hefur hinsvegar dregist stórlega saman á síðust 12 mánuðum eða um heil 9,3% og er nú 5.573 tonn/SS.