Haustfundalota Landssambands kúabænda stendur nú sem hæst. Fjórum fundum er lokið, í Búðardal, Þingborg, Borgarnesi og Kjós. Á fundina mæta formaður og framkvæmdastjóri og fara yfir stöðu mála í nautgriparæktinni, framleiðslu og sölu mjólkurafurða og nautakjöts, stöðu verðlagsmála, aðgerðir ríkisvalds til að lækka matvöruverð og aðkomu mjólkurframleiðslunnar að því máli.

Þá er gerð grein fyrir málefnum Bjargráðasjóðs sem snúa að nautgriparæktinni, afdrifum ályktunar síðasta aðalfundar LK um innflutning á nýju kúakyni, auk margar annarra mála sem brenna á kúabændum þessa dagana. Fundarsókn hefur verið ágæt og umræður oft mjög líflegar. Næstu fundir eru í kvöld í Fossbúð, Skógum, á morgun á Hótel Kirkjubæjarklaustri og annað kvöld á Seljavöllum.