Það er alþekkt að með tímanum verða steypt gólf hál, umferð kúnna og flórsköfur sjá fyrir því. Að jafnaði eru bitar nægjanlega stamir fyrstu 2-3 árin, eftir það vilja þeir verða hálir. Um árabil hefur verið reynt að fræsa þá, en árangurinn af því er ekki til langframa. Í nýjasta tölublaði danska tímaritsins Bovilogisk er pistill um það hvernig árangursríkast er að koma í veg fyrir að steingólf og –bitar verði hál.

 Aðferðin felst einfaldlega í því að skera raufar í steypuna. Raufarnar eru 2-3 mm í þvermál og 2 mm á dýpt, best er að hafa millibilið 10 mm. Fyrirtæki á vegum Knud Iversen í Vemb á Vestur-Jótlandi hefur tekið að sér þetta verkefni síðan í desember sl. og er með 3 vélar í gangi við það. Kostnaðurinn er 30 dkk á fermetra, eða 360 íslenskar krónur.