Gríðarleg hækkun varð á heimsmarkaðsverði mjólkurafurða á uppboði Global Dairy Trade sem fram fór í dag. Að jafnaði hækkaði verð mjólkurafurða um tæp 15% frá síðasta uppboði þann 5. mars sl. Þá hækkaði verðið um 10%, þannig að heimsmarkaðsverð mjólkurafurða er á hraðri uppleið um þessar mundir. Það kemur sér vel fyrir hérlenda kúabændur, þar sem útflutningur á sér að stórum hluta stað á vormánuðum þegar innvigtunin er í hámarki.  

Mest hækkun varð á nýmjólkurdufti, 21,2%, smjörolía hækkaði um 16,3%, cheddar ostur um 13,7%, smjör um 11,5% og undanrennuduft hækkaði um 7,7%. Alls skiptu tæp 16.000 tonn af afurðum um eigendur á uppboði dagsins, sem er miklu minna en hefðbundið er. Ein helsta ástæða hækkunar á heimsmarkaðsverði mjólkurafurða um þessar mundir er mikill þurrkur sem ríkir á Nýja-Sjálandi, eins og lesa má um hér. Verð á uppboði Global Dairy Trade hefur ekki verið hærra síðan í desember 2007, í rúmlega fimm ár./BHB