Á sameiginlegum fundi stefnumörkunarhóps Landssambands kúabænda og stjórnar Samtaka afurðastöðva í mjólkuriðnaði, sem haldinn var á Hvanneyri 3. júní sl., kom fram að samkvæmt áætlunum SAM um sölu og birgðir mjólkurafurða, má gera ráð fyrir að greiðslumark mjólkur á næsta verðlagsári verði 119 milljónir lítra. Sala mjólkurafurða á innanlandsmarkaði hefur gengið ágætlega undanfarna mánuði og því verður greiðslumarkið aukið um 2 milljónir lítra, eða 1,7%.

Gangi þetta eftir, verður þetta fimmta verðlagsárið í röð sem greiðslumark mjólkur er aukið. Það má teljast mikið ánægjuefni. Í töflunni hér að neðan má sjá þróun á magni greiðslumarks mjólkur frá því 2001, auk væntanlegs greiðslumarks í mjólk á næsta verðlagsári. Sú skipan við ákvörðun greiðslumarks sem nú er við lýði, að miða það við þann efnaþátt sem meira er neytt af, þ.e. próteini, var samþykkt á aðalfundi LK árið 2006.

 

Verðlagsár	Greiðslumark mjólkur, milljónir lítra
2001/2	104
2002/3	106
2003/4	105
2004/5	106
2005/6	111
2006/7	116
2007/8	117
2008/9	119

 

Það er síðan á verksviði Framkvæmdanefndar búvörusamninga að gera tillögu til ráðherra landbúnaðarmála um stærð greiðslumarksins. Ráðherra gefur síðan út reglugerð þ.a.l. Þeirrar reglugerðar er að vænta fljótlega.