Beint í efni

Góð vetraraðsókn að Disney World bendir til góðrar nautakjötssölu!

17.01.2012

Talið er að framleiðsla á nautakjöti í Bandaríkjunum verði fjórum prósentum minni í ár en í fyrra. Skýringin liggur í færri nautgripum og ætluðum minni sláturþunga vegna minni beitargróðurs. Þessar staðreyndir munu klárlega leiða af sér verðhækkanir á nautakjöti í Bandaríkjunum og gætu því einhverjir haft áhyggjur af því að sitja uppi með miklar nautakjötsbirgðir. Í fréttaskýringu Beefsite eru þó slíkar áhyggjur ekki til staðar þar sem fullvíst er talið að neytendur muni ekki hætta í stórum stíl að borða nautakjöt.

 

Vestan hafs mæla spekingarnir nefninlega væntanlega neysluhegðun með margskonar hætti en ein leiðin sem nefnd er, er að skoða vetraraðsókn að fjölskylduskemmtigarðinum Disney World! Nýlegar tölur þaðan og reyndar frá fleiri sambærilegum skemmtigörðum benda til þess að fleiri og fleiri hafi nú orðið aukafjármagn til þess að nota og að sú staðreynd muni því vega upp á móti verðhækkunum á nautakjöti. Þannig er talið að þrátt fyrir hærra verð á kjöti, þá muni ekki verða vandamál með sölu þess. Fróðlegt væri að gera sambærilega könnun á aðsókn að Húsdýragarðinum og neysluhegðun kjöts hér á landi/SS.