Beint í efni

Góð sala nautgripakjöts í október

16.11.2011

Bændasamtökin hafa tekið saman nýjar framleiðslu- og sölutölur fyrir október. Í samantektinni kemur fram að sala á nautakjöti var 17,2% meiri en hún var á sama tíma í fyrra og að ársfjórðungssalan hafi verið 6,6% meiri. Þessi niðurstaða fyrir október hefur jafnframt leitt til þess að árssalan, þ.e. salan sl. 12 mánuði, er nú einungis rétt undir sölu síðustu 12 mánuða þar á undan eða 0,2%.
 
Heildarframleiðsla nautgripakjöts sl. 12 mánuði var 3.813 tonn af 27.392 tonna framleiðslu kjöts í það heila og er hlutdeild nautakjötsins því 13,9% í framleiðslunni. Alls nam sala nautgripakjöts í mánuðinum 361 tonni og sl. 12 mánuði var salan 3.831 tonn. Sé horft til sundurliðunar á sölu nautgripakjöts í mánuðinum var sem fyrr mest sala í ungnautakjöti eða 196 tonn og á 12 mánaða grunni nemur ungnautakjötssalan 2.180 tonnum eða 56,9% af heildarsölunni. Sala á kýrkjöti á ársgrunni nam 1.381 tonni eða sem nemur 36,1% af heildarsölunni.
 

Fyrstu níu mánuði ársins nam innflutningur nautgripakjöts 398 tonnum en hérlend sala af nautgripakjöti á sama tíma u.þ.b. 2.199 tonnum (m.v. 70% nýtingarhlutfall fallþunga). Selt nautgripakjöt hér á landi fyrstu níu mánuði ársins (janúar til september) er því nálægt því að vera 2.597 tonn og hlutdeild innflutts nautgripakjöts því um 15% af heildarneyslu á nautakjöti það sem af er árinu.

 

Sé litið til annarra kjöttegunda kemur í ljós að heildarsalan hefur dregist saman sl. 12 mánuði um 2,7% sem er góður framgangur frá því í síðasta mánuði. Mest er salan á alífuglakjöti á landsvísu eða 6.981 tonn (30,0%) og þar á eftir kemur lambakjöt með 6.025 tonn eða 25,9% markaðshlutdeild/SS.