Írska afurðafélagið Glanbia, sem er samvinnufélag þarlendra kúabænda, er nú byrjað að lána félagsmönnum sínum fyrir framkvæmdum en um einkar áhugaverða fjármögnunarleið er að ræða. Félagið gerir þetta m.a. í samstarfi við hollenska landbúnaðarbankann Rabobank. Lánið kallast á ensku „MilkFlex“ sem þýða mætti sem „sveigjanleg mjólk“ en hugmyndin á bak við lánið er að endurgreiðsla þess sé fasttengd við afurðastöðvaverð Glanbia. Sé verðið t.d. lágt á þeirra mælikvarða , 39 krónur á kíló mjólkur, dragast endurgreiðslurnar saman og fari afurðastöðvaverðið undir 36,5 krónur/kg. þá stöðvast með öllu endurgreiðslur bændanna.

 

Alls geta kúabændurnir fengið frá 3 milljónum íslenskra króna og allt að 42 milljónum íslenskra króna að láni á vöxtum sem verða 3,75% hærri en almennir seðlabankavextir Evrópusambandsins sem eru sem stendur 0%/SS.