Undirbúningur fyrir stærstu landbúnaðarsýningu heims, Agritechnica, er þegar komin í fullan gang þrátt fyrir að hún opni dyrnar fyrst eftir tæplega tíu mánuði. Fréttir af áhuga fyrirtækja á leigu á sýningaraðstöðu bera þess merki að markaður með landbúnaðartæki sér heldur betur að taka við sér á ný, en útlit er fyrir 10% aukningu á sýningarrými og er fjöldi söluaðila þegar kominn yfir 2.000.

 

Agritechnica, sem haldin verður í Hanover í Þýskalandi dagana 15.-19. nóvember, er eins og áður segir stærsta sýning heimsins en búast má við því að gestir sýningarinnar  

verði í kringum 350 þúsund. Hægt er að kynna sér sýninguna nánar á heimasíðu hennar: www.agritechnica.com.

 

Framundan eru ýmsar aðrar sýningar og er t.d. stór hópur íslenskra bænda á leið á landbúnaðarsýninguna Sima í París sem hefst nú á sunnudaginn kemur. Það er einnig glæsileg sýning með rúmlega 1.400 sýnendur og er búist við því að gestafjöldi fari yfir 200 þúsund í ár.