Beint í efni

GDT: heimsmarkaðsverðið þokast upp á við

08.01.2019

Í síðustu viku var haldið uppboð á mjólkurvörum hjá GDT (Global Dairy Trade) og hækkaði meðalverð mjólkurvaranna um 2,8%. Þetta er þriðja hækkunin í röð á markaðinum eftir marga mánuði þar á undan þar sem verðið seig niður á við, þó varð aldrei verulegt fall á markaðinum árið 2018 og eru flestir á því að markaður mjólkurvara í heiminum hafi verið nokkuð stöðugur á nýliðnu ári. Á þessu uppboði núna varð hækkun á öllum vörufl0kkum sem voru í boði og hækkuðu duftaðar áfir mest eða um 9,3% og kostar nú tonnið af áfum 3.252 dollara. Þess má reyndar geta að um frekar lítið magn var að ræða en engu að síður góð hækkun og hefur verð á þurrkuðum áfum ekki verið hærra í nærri fimm ár! Á eftir „smjörmjólkinni“ eins og áfirnar kallast nú á flestum öðrum tungumálum þá hækkaði undanrennuduftið mest eða um 7,9%.

Sé litið til einstakra vöruflokka þá fást núna 2.705 dollarar fyrir tonnið af mjólkurdufti, 2.201 dollarar fyrir tonnið af undanrennudufti og 4.076 dollarar fyrir tonnið af smjörinu . Í heildina var á þessum markaði verslað með um 29 þúsund tonn og nam meðalverð viðskiptanna 2.986 dollurum á tonnið og nam heildarverðmæti viðskiptanna á þessu eina uppboði því rúmlega 10 milljörðum íslenskra króna. Verðstuðull heimsmarkaðsverðsins er nú 904 stig. Til þess að fræðast nánar um uppboðið má smella hér/SS