Í gær var haldið uppboð á mjólkurvörum hjá GDT (Global Dairy Trade) og hélt meðalverðið áfram að hækka en hækkunin nú var þó ekki nema 0,9%. Þessi hækkun nú var sú sjötta í röðinni og eru það vissulega góð tíðindi fyrir alla sem vinna á útflutningsmörkuðum. Verðþróunin nú, þ.a. óveruleg hækkun, er reyndar í samræmi við væntingar um verðþróunina eins og kom fram í frétt naut.is um GDT 7. febrúar sl. og má lesa hér.

Á þessu uppboði núna varð hækkun á flestum vörufl0kkum sem voru í boði og hækkaði cheddar ostur mest eða um 2,9%. Það sem þó mest vegur inn í heildarmyndina er hvernig verðþróunin er á mjólkurdufti, undanrennudufti og svo smjöri. Á þessum markaði nú hækkaði mjólkurduftið um 0,3% og fást núna 3.022 dollarar fyrir tonnið af því. Tonnið af undanrennudufti kostar nú 2.580 dollara og hækkaði það um 2,8% núna og þá hækkaði smjörið um 1,2% og kostar tonnið af því nú 4.495 dollara. Verðstuðull heimsmarkaðsverðsins er eftir þessa litlu hækkun kominn í 1.014 stig, sem er svipað gengi og var í júní í fyrra. Til þess að fræðast nánar um uppboðið má smella hér/SS