Fyrir nokkru voru fyrstu 32 kýrnar fluttar í hið fljótandi fjós í Rotterdam, sem höfum áður sagt frá hér á naut.is. Fjósið er hið fyrsta sinnar tegundar, enda er það byggt á einskonar pramma sem er á floti í bryggjunni í Rotterdam. Aðal tilgangur þessarar tilraunar er að kanna hvort hægt sé að stunda landbúnað á áður ónumdu landi, í þessu tilfelli reyndar sjó. Aukinn fólksfjöldi í heiminum kallar á aukna matvælaframleiðslu og þar sem aukið land fer daglega undir húsnæði og vegi og fleira slíkt sem fylgir fjölguninni þarf að finna nýjar leiðir til að metta fólkið.

Þetta 32ja kúa bú mun í upphafi framleiða 800 lítra af mjólk á dag en pramminn er tengdur við beitarland með sérstakri brú sem kýrnar ganga um svo þær komist á beit. Allur búnaður í þessu nýstárlega fjósi er afar fullkominn og er t.d. uppgufun á ammoníaki frá framleiðslunni hverfandi vegna sérstakrar tækni sem er notuð/SS.