Matvælaráðuneytið hefur nú greitt út fyrirframgreiðslur vegna kornræktar til þeirra sem sóttu um jarðræktarstyrki. Samtals fá 48 bú fyrirframgreiðslu sem samanlagt eru með 1.048 hektara lands í kornrækt. Greiddar voru 9.946 krónur á hvern hektara eða 25% jarðræktarstyrks ársins 2022.

Byggir fyrirframgreiðslan á tillögum um eflingu kornræktar sem Svandís Svavarsdóttir matvælaráðherra kynnti í mars sl. Tillögurnar voru unnar af Landbúnaðarháskóla Íslands og kemur þar fram að áætlaður kostnaður við kornrækt á Íslandi sé sambærilegur við nágrannalönd. Að auki liggja helstu styrkleikar íslenskrar kornræktar í frjósömu og ódýru ræktarlandi, lágum raforku- og heitavatnskostnaði, og lágum kostnaði við varnarefni. Einnig benda niðurstöður til að nýting jarðvarma til að þurrka korn sé bæði raunhæfur og hagkvæmur kostur.

Næsta greiðsla vegna jarðræktarstyrkja verður greidd út í desember á þessu ári að lokinni úttekt á vegum búnaðarsambanda, sem annast úttekt fyrir hönd ráðuneytisins. Uppskera er forsenda fyrir greiðslu jarðræktarstyrks.