Það er ekki víst að margir kannist við afurðafélögin Frischli Milchwerke og Sahnemolkerei H. Wiesehoff en þetta eru þýsk félög með sameiginlega veltu í kringum 60 milljarða íslenskra króna. Frischli er mun þekktara félag en það er sérhæft í framleiðslu á G-vörum og mjólkurdufti og er með þrjár vinnslustöðvar í Þýskalandi og er eitt og sér með veltu í kringum 50 milljarða króna. Wiesehoff félagið hefur hins vegar að mestu verið á ferskvörumarkaði fyrir stóreldhús.

Þrátt fyrir myndarlegar veltutölur, eru þetta í raun smáfyrirtæki í alþjóðlegum samanburði. Nú hafa forsvarsmenn félaganna tveggja því ákveðið að steypa saman sölu- og markaðssviðum þeirra til þess að styrkja stöðuna gagnvart hinum stóru aðilum á þýska markaðinum. Ekki er um samruna að ræða heldur virkt samstarf, sem hefur þó eignatengingu líka þar sem Frichli kaupir lítinn hlut í Wiesehoff þegar sölu- og markaðssviðin verða sameinuð/SS.