Hollenska afurðafélagið Friesland Campina, sem er samvinnufélag þarlendra kúabænda, er afar öflugt félag og með rekstur í mörgum löndum m.a. vegna uppkaupa félagsins á öðrum afurðafyrirtækjum í mjólkuriðnaði. Félagið er m.a. með rekstur í Þýskalandi en nú hefur verið ákveðið að fara í verulegar hagræðingaraðgerðir á þremur vinnslustöðvum þess þar. Vegna þessara aðgerða hefur félagið þurft að segja upp rúmlega 230 manns sem starfa í dag í Gütersloh, Heilbronn og Köln.

Markmið aðgerða Friesland Campina er að draga úr framleiðslu á mörgum ólíkum vörumerkjum og þess í stað að horfa fyrst og fremst til vörumerkjanna Landliebe, Tuffi og Frico sem eru afar vel þekkt vörumerki í dag. Þá ætlar félagið að hætta í framleiðslu á eftirréttum og fyrst og fremst vinna að framþróun hefðbundinna mjólkurvara. Þetta eru töluvert breyttar áherslur félagsins en að sögn forsvarsmanna Friesland Campina er þess vænst að ávinningur af breytingunum muni skila sér í bættum rekstri félagsins á komandi árum/SS.